၂၀၂၁ နံၣ်, လါမးရှး ၁၀ သီ, သူလ့ၤတၢ်ကစီၣ်

မုၢ်တြီၢ်ကီၢ်ရ့ၣ်အပူၤ ကီၢ်ဆၣ်ခံဘ့ၣ် လၢအမ့ၢ် လူၤသီ ဒီး ဘုသိၣ် သ့ၣ်တဖၣ်အပူၤ ပယီၤသုးကလၢၤလၢ အအိၣ်ဆီလီၤအသး ဘူးဒီးဟီၣ်ကဝီၤသ့ၣ်တဖၣ်န့ၣ် ခးလီၤကျိဖးဒိၣ်, ကျိဖိတဖၣ် ကိးမုၢ်နံၤဃၣ်ဃၣ်န့ၣ် ပသ့ၣ်ညါဘၣ်အီၤန့ၣ်လီၤ.

ဖဲလါမးရှး ၉ သီ, ၂၀၂၁ နံၣ်အနံၤ ပယီၤသုးကလၢၤလၢ အအိၣ်ဆီလီၤအသးဖဲ လူၤသီကီၢ်ဆၣ် ဟီၣ်ကဝီၤ ၀ၣ်ကျ့ၣ်တူၢ် သုးကလၢၤတဖၣ် ဖဲဂီၤခီ ၉း၀၀ နၣ်ရံၣ်အဆၢကတီၢ် ခးလီၤကျိဖးဒိၣ် ၅ ဖျၢၣ်ဆူ စီၤမုၢ်ပျီ ကမျၢၢ်တၢ်ဖံးအီၣ်မၤအီၣ်အလီၢ် န့ၣ်လီၤ. မၤကဒီးဖဲ ဂီၤခီ ၁၁း၀၀ နၣ်ရံၣ်အဆၢကတီၢ် ပယီၤသုးကလၢၤ လၢအမ့ၢ် စကခ (၄) ခမရ (၇၀၅) ဒီး ခမရ (၇၀၉) အိၣ်ဆီလီၤအသး လူၤသီကီၢ်ဆၣ်, ခ့ပူၤကရူၢ်, ဆၣ်လီၤကၠိတဖၣ် ခးလီၤကျိဖးဒိၣ်ဖဲ ၁၁း၅၀ မံးနံးဆၢကတီၢ် ခးလီၤဝဲဆူ ကဆံၣ်ဒ့ (၂) ဖျၢၣ်, မီလူၢ် (၂) ဖျၢၣ် လၢအမ့ၢ် ကီၣ်ထၢၣ်ဒၢ, ကမျၢၢ်တၢ်ဖံးအီၣ်မၤအီၣ်အလီၢ်အကျဲန့ၣ် ပသ့ၣ်ညါဘၣ်အီၤ န့ၣ်လီၤ. ဒူဖိသဝီဖိလၢ အိၣ်လၢတၢ်ပျံၤတၢ်ဖုးအပူၤတဖၣ် မ့ၢ်ဝဲ ကီၣ်ထၢၣ်ဒၢသဝီ ဟံၣ်ဒူၣ်နီၣ်ဂံၢ်ခဲလၢၥ် (၁၄) ဒူၣ်, ပှၤနီၣ်ဂံၢ်ခဲလၢၥ် (၁၁၆) ဂၤန့ၣ်လီၤ.

ဖဲလါမးရှး ၇ သီ, ၂၀၂၁ နံၣ် အနံၤ ဟါခီအဆၢကတီၢ် ဘုသိၣ်ကီၢ်ဆၣ်အပူၤ ပယီၤသုးကလၢၤ လၢအမ့ၢ် စကခ (၈) ခမရ (၄၀၁) တဖၣ် ခးလီၤကျိဖးဒိၣ်ဆူ ပၢၤထၣ်သဝီ န့ၣ်လီၤ. ပၢၤထၣ်သဝီ ဟံၣ်ဒူၣ်နီၣ်ဂံၢ် (၃၄) ဒူၣ်, ပှၤနီၣ်ဂံၢ်ခဲလၢၥ် (၁၃၇) ဂၤဘၣ်ဃ့ၢ်ထီၣ်ကွံၥ်လၢ သဝီအဂ့ၢ်န့ၣ် ပသ့ၣ်ညါဘၣ်အီၤန့ၣ်လီၤ.
စးထီၣ်လၢ လါယနူၤအါရံၤထီၣ် (၁) သီ, ၂၀၂၁ နံၣ်န့ၣ် ပသ့ၣ်ညါဘၣ်လၢ ပယီၤသုးတဖၣ် ဟူးဂဲၤခးလီၤကျိဖးဒိၣ် ဆူထံဖိကီၢ်ဖိ အဒူအသဝီ လၢအအိၣ်ဘူးဒီး ပယီၤသုးကလၢၤတဖၣ် ကိးမုၢ်နံၤဃၣ်ဃၣ်အဃိ ကမျၢၢ်ထံဖိကီၢ်ဖိတဖၣ် ဘၣ်အိၣ်လၢ တၢ်ပျံၤတၢ်ဖုးအလီၢ် ထီဘိန့ၣ်လီၤ.