လၢၢ်ဒိၣ် ဒီး မုၢ်သဲၤ သိလ့ၣ်ကျဲအပူၤ တၢ်ဒုးကဲထီၣ်လၢ ကညီတၢ်ထူၣ်ဖျဲးသုးမုၢ်ဒိၣ် ဒီး ပယီၤမီၤစိရိၤသုး အဘၢၣ်စၢၤ

လါမ့ၤ ၂၆ သီ, ၂၀၂၁ နံၣ်, သူလ့ၤတၢ်ကစီၣ်
ဖဲ ၂၀၂၁ နံၣ် လါမ့ၤ ၂၅ သီ, ဟါလီၤခီ ၃ နၣ်ရံၣ်အဆၢကတီၢ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ချၢၣ်လွံၢ်ထူၣ်ကီၢ်ရ့ၣ်, လၢၢ်ဒိၣ်ကီၢ်ဆၣ် ဟီၣ်ကဝီၤပူၤ လၢၢ်ဒိၣ်-မုၢ်သဲၤ ကါကျဲပူၤန့ၣ် ပယီၤမီၤစိရိၤအသုးကရူၢ်တဖၣ် စိၥ်ဆှၢဝဲ အပှၤဆါ ၇ ဂၤကတီၢ် ဒီး ဖဲအတုၤလၢ ကဲၤဘါတၢ်လီၢ်န့ၣ် ဘၣ်သဂၢၢ်လိၥ်သးဒီး ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် သုးက့ ၃ သုးဖိတဖၣ်အဃိ တၢ်ဒုးကဲထီၣ်ဝဲဒၣ်န့ၣ်လီၤ.

ဖဲတၢ်ဒုးကဲထီၣ်တၢ်လီၢ်န့ၣ် အိၣ်ဘူးဝဲဒၣ်ဒီး ကိၤနဲၤဝ့ ဒီး ကိၤဝ့တ့ၤ တဖၣ် အကျးအဃိ ကျိဖးဒိၣ်ကျံလီၤတဲၥ်ဝဲလၢ ကိၤနဲၤဝ့ ကျးပူၤဒီး ကျးတၢ်သူၣ်ထီၣ် ဒီး တၢ်ဖိတၢ်လံၤတဖၣ် ဟးဂီၤကွံၥ်ဝဲ တကးဘၣ် ကိၤဝ့တ့ၤ အမၢၤစ့ၢ်ကီး ဘၣ်ဒိဝဲဒီး ကျိဖးဒိၣ်အက့ န့ၣ်လီၤ.

လၢန့ၣ်အမဲၥ်ညါ ကျိဖးဒိၣ်ချံတနီၤ လီၤတဲၥ်ဝဲလၢ ကမျၢၢ်တဖၣ်အကရၢၢ်ပူၤ ဒီး ပိၢ်ဖးထီၣ်ဝဲဒၣ်အိၣ်ဝဲဒၣ်စ့ၢ်ကီးန့ၣ်လီၤ. လၢပယီၤမီၤစိရိၤအသုးတဖၣ်တခီ တၢ်ဘၣ်ဒိဘၣ်ထံးအိၣ်ဒ်လဲၣ်န့ၣ် တသ့ၣ်ညါလီၤတံၢ်ဒံးဘၣ်န့ၣ်လီၤ. မ့မ့ၢ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်တခီ တၢ်ဘၣ်ဒိဘၣ်ထံးတအိၣ်ဝဲဒၣ်ဘၣ် န့ၣ်လီၤ.