ဆီထံးကီၢ်ဆၣ် နီၣ်ဂံၢ် (၁) တီၤထီကၠိ တၢ်က့ၤစးထီၣ်ကဒါက့ၤကၠိ ဒီး တၢ်ကီတၢ်ခဲလၢ တၢ်ဘၣ်ကွၢ်ဆၢၣ်မဲၥ် တဖၣ်

ဆီထံးကီၢ်ဆၣ် နီၣ်ဂံၢ် (၁) တီၤထီကၠိ တၢ်က့ၤစးထီၣ်ကဒါက့ၤကၠိ ဒီး တၢ်ကီတၢ်ခဲလၢ တၢ်ဘၣ်ကွၢ်ဆၢၣ်မဲၥ် တဖၣ်
ဒ့ၣ်ညါလါလီၤ ၂ သီ, ၂၀၂၁ နံၣ်, သူလ့ၤတၢ်ကစီၣ်
ဖဲလါယူၤ ၂ သီ, ၂၀၂၁ နံၣ် ကီၢ်ရ့ၣ်ချၢၣ်လွံၢ်ထူၣ် ဆီထံးကီၢ်ဆၣ် နီၣ်ဂံၢ် (၁) တီၤထီကၠိအံၤ တၢ်က့ၤစးထီၣ် တူၢ်လိၥ်ပှၤမၤလိတၢ်ဖိသ့ၣ်တဖၣ် လၢ ၂၀၂၁-၂၀၂၂ တၢ်မၤလိနံၣ် န့ၣ်လီၤ. ကၠိအံၤ လၢအပူၤကွံၥ် မ့ၢ်ဒၣ်တီၤဖုၣ်ကၠိ ဒီး တဆီဘၣ်တဆီ ကဲထီၣ်ဆူ တီၤခၢၣ်သးကၠိ န့ၣ်လီၤ. ကီၢ်ဆၣ်, သုးရ့ၣ်, ကရူၢ်, ဒူသဝီခိၣ်နၢ်တဖၣ် အတၢ်ကျဲးစၢး ပၥ်ဖှိၣ်မၤသကိးအဃိ ဖဲ ၂၀၁၂ နံၣ်န့ၣ် နီၣ်ဂံၢ် (၁) ကၠိအံၤ တၢ်သုးထီၣ်က့ၤအီၤ အပတီၢ်ဆူ တီၤထီကၠိ န့ၣ်လီၤ.
နီၣ်ဂံၢ် (၁) တီၤထီကၠိအံၤ တၢ်က့ၤအိးထီၣ်ကဒါက့ၤအီၤ ဒ်သိး ဖိဒံဖိသၣ်တဖၣ် ကမၤလိဘၣ်တၢ် အဂီၢ်န့ၣ်လီၤ. လၢတၢ်က့ၤစးထီၣ်ကဒါက့ၤကၠိအံၤ တၢ်ဂ့ၢ်ကီလၢ ကဘၣ်ကွၢ်ဆၢၣ်မဲၥ်တဖၣ် မ့ၢ်ဝဲ လံၥ်လဲၢ်, ကၠိပီးလီတဖၣ်, ဒီး ကၠိသရၣ်/သရၣ်မုၣ်တဖၣ် တလၢတလီၣ်ဒံး စ့ၢ်ကီးဘၣ်န့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဟီၣ်ကဝီၤပူၤ (Covid-၁၉) တၢ်အိၣ်သးအဖီခိၣ် ကၠိအိၣ်ဝဲအါမးလၢ တၢ်တက့ၤအိးထီၣ်ကဒါဒံးအီၤဘၣ် ဒီး အါန့ၢ်အန့ၣ် သုးမီၤစိရိၤဟံန့ၢ်ဆူၣ် တၢ်စိတၢ်ကမီၤဝံၤအလီၢ်ခံ ထံလီၢ်ကီၢ်ပူၤ တၢ်ဒုးတၢ်ယၤဆူၣ်ထီၣ်အဃိ ကၠိအိၣ်ဝဲအါမးလၢ ထီၣ်ကဒါက့ၤတသ့ဘၣ် န့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်ရ့ၣ်ချၢၣ်လွံၢ်ထူၣ် ဆီထံးကီၢ်ဆၣ် တၢ်ကူၣ်ဘၣ်ကူၣ်သ့န့ၣ် ဘၣ်တၢ်တီခိၣ်ရိၣ်မဲအီၤလၢ (KECD) ဝဲၤကျိၤအဖီလၥ် န့ၣ်လီၤ. ကၠိခဲလၢၥ် လၢအအိၣ်လၢ ကီၢ်ဆၣ်ဟီၣ်ကဝီၤပူၤတဖၣ် တၢ်ကဘၣ်က့ၤ စးထီၣ်ကဒါက့ၤအီၤလၢ လါယူၤအပူၤန့ၣ် (KECD) ဘိးဘၣ်ပၥ်ဖျါစ့ၢ်ကီးဝဲ န့ၣ်လီၤ.