လါအီကူး ၁ သီတုၤ ၁၅ သီ အတီၢ်ပူၤ ပယီၤသုး အတၢ်ဟူးတၢ်ဂဲၤ အါထီၣ်လၢ မုၢ်တြီၢ်ကီၢ်ရ့ၣ် ဟီၣ်ကဝီၤပူၤအဂ့ၢ်

လါအီကူး ၁၈ သီ, ၂၀၂၁ နံၣ်, သူလ့ၤတၢ်ကစီၣ်
ခီဖျိပယီၤသုးမီၤစိရိၤတဖုအံၤ ဟဲထီၣ်ဟူးဂဲၤအါထီၣ်လၢ မုၢ်တြီၢ်ကီၢ်ရ့ၣ် သုးက့ ၅ ဟီၣ်ကဝီၤပူၤအဖီခိၣ် တၢ်ခးလိၥ်သး ကဲထီၣ်ဝဲဒၣ်အဂ့ၢ်န့ၣ် ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်တၢ်ကစီၣ် စံးဝဲဒၣ်န့ၣ်လီၤ.
ပယီၤသုးမီၤစိရိၤ လၢအဟဲနုၥ်လီၤဟူးဂဲၤလၢ မုၢ်တြီၢ်ကီၢ်ရ့ၣ် သုးက့ ၅ ဟီၣ်ကဝီၤပူၤတဖၣ် ခီဖျိလၢ အတၢ်ဟဲဆီၣ်သနံးဝဲဒၣ် ထံဖိကီၢ်ဖိကမျၢၢ်, ဟံးန့ၢ်ဆူၣ်ဝဲ အတၢ်လီၢ်တၢ်ကျဲ, အဟီၣ်ခိၣ်ကပံၥ် မၤဘၣ်ဒိဝဲကမျၢၢ်ထံဖိကီၢ်ဖိ လၢတၢ်ဂ့ၢ်ဒ်အံၤအဖီခိၣ် တၢ်ဘၣ်ဂံၥ်ဂုၥ် ခးလိၥ်သး ကဲထီၣ်ဝဲဒၣ်ဒီး ကညီဒီကလုၥ် တၢ်ထူၣ်ဖျဲး သုးမုၢ်ဒိၣ် သုးက့ ၅ အသုး ကိးနံၤဒဲးအဂ့ၢ်န့ၣ် မုၢ်တြီၢ်ကီၢ်ရ့ၣ် သုးက့ ၅ ပှၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးဝဲဒၣ်န့ၣ်လီၤ.
တလါအံၤ လါအီကူး ၁ သီ တုၤလါအီကူး ၁၅ သီ ၂၀၂၁ နံၣ် ပယီၤသုးမီၤစိရိၤ ဒီး ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် သုးက့ ၅ စုတီၤဖီလၥ် သုးရ့ၣ်တဖၣ် တၢ်ဘၣ်သဂၢၢ်ခးလိၥ်သး ကဲထီၣ်ဝဲဒၣ် ဒီး ပယီၤသုးမီၤစိရိၤ ခဲလၢၥ် ၅၆ ဘျီ, ပယီၤသုးတကပၤ သံဝဲဒၣ် ၃၄ ဂၤ, ဘၣ်ဒိ ၁၅ ဂၤ, ပယီၤသုးဘၣ်ဒိအကျါ ပၣ်ဃုၥ်ဒီး အသုးရ့ၣ်ခိၣ်တဂၤ ဒီး ပယီၤသုးခးလီၤကျိဖးဒိၣ် လၢကမျၢ်ၢ်ထံဖိကီၢ်ဖိ အတၢ်ဖံးတၢ်မၤအီၣ်အလီၢ်အကျဲ ခဲလၢၥ် ၈၈ ဖျၢၣ်, ကျိဖိခဲလၢၥ် (၁၅၀၀) ဖျၢၣ်, လၢကညီဒီကလုၥ် တၢ်ထူၣ်ဖျဲးသုးမုၢ်ဒိၣ် သုးက့ ၅ အပှၤတကပၤ ဘၣ်ဒိဝဲဒၣ် ၃ ဂၤ, ကမျၢၢ်ထံဖိကီၢ်ဖိ ဘၣ်ဒိဝဲဒၣ်တဂၤ ဒီး သံဝဲဒၣ်တဂၤ အဂ့ၢ်န့ၣ် သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးဝဲဒၣ်န့ၣ်လီၤ.
စးထီၣ်လါအီကူး ထီၣ်တုၤလၢ်ခဲအံၤ ပယီၤသုးတဖၣ် ဟဲနုၥ်ဟူးဂဲၤအါထီၣ်ဝဲဒၣ်လၢ မုၢ်တြီၢ်ကီၢ်ရ့ၣ် သုးက့ ၅ ဟီၣ်ကဝီၤပူၤ အါထီၣ်ဝဲဒၣ် တကးဒံးဘၣ် ဆှၢအါထီၣ်ဝဲ အတၢ်အီၣ်တၢ်အီ တၢ်ပီးတၢ်လီ ဒီး ပှၤဂံၢ်ဘါအဂ့ၢ်န့ၣ် တၢ်သ့ၣ်ညါဘၣ် ဝဲဒၣ်န့ၣ်လီၤ.