ကီၢ်ပယီၤ သုးမီၤစိရိၤ ဟံဆူၣ်တၢ်စိတၢ်ကမီၤတဖု ပျိၥ်လဲအသးဒ် ပၢၤကီၢ် ဒ်သိးကဖီၣ် (CDM) လၢအအိၣ်ကဒုဖဲ (KNU) ဟီၣ်ကဝီၤတဖၣ် အဂီၢ်

လါအီကၢး (၂၈) သီ, ၂၀၂၁ နံၣ်
ဖဲလါအီကၢး (၂၈) သီ ကီၢ်ရ့ၣ်ချၢၣ်လွံၢ်ထူၣ်, ဆီထံးကီၢ်ဆၣ် (သုးရ့ၣ်-၇) ဟီၣ်ကဝီၤ တၢ်ဘၢၣ်စၢၤ ကီၢ်ပယီၤသုးမီၤစိရိၤ ဟံဆူၣ်တၢ်စိတၢ်ကမီၤ သုးနီၣ်ဂံၢ် လၢအမ့ၢ်ဝဲ ခလရ (၃၅၀) ဒီး ခလရ (၅၄) အသုးတဖၣ် ပျိၥ်လဲအသး ဒ်ပၢၤကီၢ် ဒ်သိးကမျၢၣ်သုတသ့ၣ်ညါအီၤတဂ့ၤ ဒီး ကလူၤဖီၣ်ဝဲ (CDM) တဖၣ်အဂီၢ်န့ၣ်လီၤ.

ဖဲလါအီကၢး (၂၄) သီ ကီၢ်ပယီၤသုးမီၤစိရိၤ ဟံဆူၣ်တၢ်စိတၢ်ကမီၤ ဟဲမၤအါထီၣ်အသုး နီၣ်ဂံၢ်လၢသိလ့ၣ် (၆) ခိၣ် ဖဲဝ့ၢ်ထူ သုးကလၢၤဖးဒိၣ်န့ၣ်လီၤ. သုးသ့ၣ်တဖၣ်အံၤ မုၢ်ဆါခီဟးဝ့ၤဝီၤလၢသိလ့ၣ် ဒီး မ့မ့ၢ်မုၢ်နၤကတီၢ် ပျိၥ်လဲသးလၢ ပၢၤကီၢ်ဒီး ဟးဝ့ၤဝီၤဝဲ တၢ်လီၢ်တနီၤ လၢအမ့ၢ် မ့လါ, သၤစ့ၣ် ဒီး တၢ်လီၢ်အဂၤတနီၤ စ့ၢ်ကီးန့ၣ်လီၤ.

ကီၢ်ပယီၤ သုးမီၤစိရိၤ ဟံဆူၣ်တၢ်စိတၢ်ကမီၤ ဒုးအိၣ်ထီၣ်တၢ်ဟူးတၢ်ဂဲၤဒ်အံၤ မ့ၢ်ဒ်သိး ကလူၤဖီၣ်ဝဲ (CDM) လၢအဟဲထီၣ်အိၣ်ကဒုလၢ (KNU) ကီၢ်ရ့ၣ် ချၢၣ်လွံၢ်ထူၣ်, သုးက့ (၃) ဟီၣ်ကဝီၤတဖၣ် အဂ့ၢ်န့ၣ် ပန့ၢ်ဘၣ်တၢ်ဂ့ၢ်တၢ်ကျိၤန့ၣ်လီၤ.

တကးဒံးဘၣ် လၢတၢ်ဆဲးကျိး ဒီး န့ၢ်ဘၣ်တၢ်ကစီၣ်အဖီခိၣ် ကီၢ်ပယီၤသုးမီၤစိရိၤ ဟံဆူၣ်တၢ်စိတၢ်ကမီၤတဖုအံၤ မၤအါထီၣ်စ့ၢ်ကီး အသုးဂံၢ်ဘါ လၢသုးကလၢၤအိၣ်ဘူး ဒီး ဝ့ၢ်ထူန့ၣ်လီၤ. တကတီၢ်ဃီ ဟးဝ့ၤဝီၤဒီး ဟူးဂဲၤဝဲလၢ မုၢ်ဆါမုၢ်နၤအဂ့ၢ်ဒီး ကမၤအါထီၣ်ဒံး သုးဂံၢ်ဘါန့ၣ် ပန့ၢ်ဘၣ်တၢ်ကစီၣ်လီၤ.